قصه وقصيده

زائر

دباس وأبوه
محمد أبو دباس من أهل (بلدة العودة) من بلدان سدير في نجد ضاقت به الدنيا ذرعا بعد رحيل ابنه دباس طلبا للرزق فقد طالت غربة دباس لأكثر من ثمان سنوات عانى خلالها والده الكثير من مضايقات قومه واعتدائهم عليه بالأقوال والأفعال حيث قالوا فيه ما يندى له الجبين ويمس الكرامة وقطعوا الماء عن نخيله فأصبح يعاني الأمرين غياب ابنه وساعده الأيمن والذل والاحتقار في دياره، فأخذ يتجنب الناس وحديثهم وعاش وحيدا منغلقا على نفسه، فنصحه أحد أصدقائه بأن يرسل إلى ابنه دباس ليعود بسرعة ويرى ما وصلت إليه الحال فكتب محمد هذه القصيدة وأرسلها مع أحدهم للديار التي يعمل بها دباس وقد اختلف الرواة في تحديد تلك البلاد فمنهم من قال أنه كان في العراق ومنهم من قال في ايران ومنهم من قال في عمان والقصيدة كالتالي:
يا ونةٍ ونيتها من خوى الـراس === من لاهبٍ بالكبد مثل السعيره
ونين من رجله غدت تقل مقواس === ويوّن تالي الليل يشكي الجبيره
ويا حمس قلبي حمس بنٍ بمحماس === ويا هشم حالي هشمها بالنجيره
ويا وجد حالي يا ملا وجد غرّاس === يوم اثمرت واشفا صفى عنه بيره
من ثمر قلبي سرا هجعة الناس === متنحرٍ دربٍ عسى فيه خيره
الله يفكه من بلا سو الاتعاس === ومن شر عبثات الليالي يجيره
فى ديرةٍ تقطعت عنه الارماس === سبعين يومٍ للركايب مسيره
لا والله ألا حال من دونه الياس === حط البحر والبر دون الجزيره
يالله ياللي رد من عقب ما ياس === يوسف على يعقوب وابصر نظيره
ترد على دباس يا محصـي الناس == =يا عالمٍ ما بالخـفا والسريره
يا دباس أنا بوصيك عن درب الادناس === ترى الذي مثلك يناظر مسيره
عليك بالتقوى ترى العز يا دباس === فى طاعة اللي ما ينجيك غيره
هاذي ثمان سنين من رحت يا دباس === لا رساله جتني ولا من بريره
يا دباس من عقبك ترى البال محتاس === وعليك دمع العين حرّق نظيره
وعليك كنى فى دجا الليل حراس === أصبح على حيلي وعيني سهيره
أصبح انا مابين طاري وهوجاس === وطواري تطري علينا كثيره
مثل الوحش قلبي على كف حباس === يكفخ كما طيرٍ اسبوقه قصيره
متحيرٍ من عيلة البيت يا دباس === ارجى ثواب الله وأخشى المعيره
أخاف من حكي العداء ثم الانجاس === أهل الحكايا الطايله والقصيره
ويقال خلا عيلته عنّز الراس === أقفى وخلى عيلةٍ له صغيره
والا فأنا يابوك قطّاع الارماس === مانيب مثبورٍ أو رجلي كسيره
آصلك لو دونك نبا حمر الاطعاس === الصلب والصمان دروب عسيره
مهالك مدارك مابها أوناس === ألا الثعل والبوم تسمع صفيره
لو كنت فى نزوى وديرة بني ياس === أهل الموازى والوجيه الغبيره
عبّادة الاصنام شرّابة الكاس === الخمر والتنباك فيها وغيره
لركب على وجنا من الهجن عرماس === فجا النحر يا دباس حمرا ظهيره
متروسة الفخذين مزبورة الراس === كن الخلاص عيونها يوم أديره
أو شبه ربدا تخفّق للأوناس === وان رفّعت جنحانها مستذيره
تنشر من العوده على نور الانفاس === عند الفجر والليل مقفي مريره
والعصر بالصمان تسمع لها اضراس === حبل الرسن خطرٍ تبتر جريره
نهار ثالث بين حما الاوراس === واره يمينك جعلها لك سفيره
ثم أركب ساجيةٍ تقلب الراس === تمشي بأهلها فى البحور الغزيره
إلى مسقط الفيحاء بها الخير محتاس === لولا الكفر والشرك واوي ديره
عز الله انها ديرةٍ مالها أجناس === لولا بها يعبد مع الله غيره
لولا بها يشرك علي وعباس === وأيضا بها الفاروق سبّه بريره
فيها الطبيخ وراهي الخبز يا دباس === يقعد خوى الراس خنة خميره
هى ديرة اللي باغيٍ كيفة الراس === ولا له أحدٍ همه مـن الناس غيره
هيسٍ ولد هيسٍ للمواعين لحّاس === يفرح إلـى نيدي لذبح النحيره
وماقفك ذا يا دباس ما فيه نوماس === يصلح لقينٍ مهنته طق زيره
ترى الفداوي دون وانشد الناس === راعيه ما يذكر بمدحٍ وغيره
ماله سوى طق الحنك منه والياس === وليا انقطع خرجه فلا له ذخيره
طلب المعيشه بالحراثه والاجناس === المشترى والبيع يوصف وغيره
قم انهض العيرات مع كل فرّاس === يا دباس دوّر خيّر تستشيره
جدك وعمانك هل العز والباس === أهل اللوازم مكملين القصيره
يا دباس ما يصبر على البق والحاس === ألا الذي ماله بنجدٍ عشيره
واليوم يا مروي شبا كل عباس === أنت الرجا يا كعام وجه المغيره
عشرين عامٍ كلها أرجيك يا دباس === مثل الغرير اللي تولع بطيره
عدل المناكب هيلعٍ فرخ قرناس === يمناه فى لطم الحباري شطيره
عانق خلوجٍ روّحت عقب مرواس === عند العصير لبيضها مستذيره
والليل جاها وحال من دونها الياس === روحها على فرقاه فرت فريره
يا دباس أنا يابوك مانيب بلاس === مير ان عيلات الرفاقه كثيره
جنبت وسط السوق وامشي مع الساس === وأخذ شوي الحق واترك كثيره
يا دباس لو جبت من دحب الاكياس === مختلفةٍ مـا بين رزٍ ونيره
مالي بها يا جعلها بألف قباس === أو جعلها تذهب ولو هي كثيره
يا دباس قلبي كل ما هب نسناس === شرقيةٍ هبت بقلبي سعيره
والحال يا فرز الوغى مسّها الباس === عليك يا ناطح وجيه المغيره
وغصون قلبي يا فتى الجود يبّاس === غادٍ أنا يابوك كني هشيره
من شافني يقول ذا فيه لسّاس === واللي برى حالي إلهي خبيره
لا وعلا من قبل غوّال الانفاس === ومفارق الدنيا يجينا بشيره
عسى يطق الباب والناس غطاس === يا والي القدرة عليك اتعبيره
وصلاة ربي عد ماهب نسناس === على النبي عدة حقوق المطيره
وتذكر بعض الروايات أنه بعد مدة قصيرة وفي وقت طلوع الفجر ذات يوم شاهدت ابنه محمد الماء يتدفق في نخل أبيها بعد انقطاعه إلا أنها لاحظت بعض الاحمرار في الماء فذهبت لتخبر والدها الذي صاح فرحا وهو يردد لقد عاد دباس وما هذا الاحمرار إلا دم من أهانوني في غيابه، وبالفعل صدق حدس الوالد بقدوم دباس وظنه الذي لم يخب في ولده، فقرت عينه وانزاح همه بوجود ابنه وساعده الأيمن، وإليكم قصيدة الابن دباس التي أرسلها لوالده قبل قدومه
حي الجواب اللي لفانا من الراس === جابه غلامٍ ما توانى مسيره
اهلا هلا عد ما حبك قرطاس === أو ما كتب فوقه بيوتٍ شطيره
جواب منهو لي مـودٍ من الناس === ابوى ما يوصف حليٍ لغيره
فرز الوغى كنه على الوكر قرناس === قروم ربعه كلها تستشيره
دليل عيراتٍ ليا هب نسناس === ثم ادلهم الجو ومابه ذخيره
مهفي الغنم لاهل الركايب والأفراس === لا روحوله فلا عليهم قصيره
راعي معاميلٍ بها العبد جلاس === للبن يشري بالسنين العسيره
هاذي بمركاها وهاذي بمحماس === وهاذي يصبه للوجيه السفيره
وخلاف ذا يا راكبٍ فوق عرماس === مامونةٍ من نقوة الهجن عيره
حمرا وهي فى سنها وقم الاسداس === متوسطٍ لا فاطر ولا هى صغيره
ماهي لحوحٍ راكبه بالعصا قاس === حرّم عليها غير شيل النقيره
والخرج هو وبيوت قيلٍ بقرطاس === مع مزهب الأيام ما هي كثيره
وفوقه غلامٍ منوته قطع الارماس === لو هو بليلٍ ما تغير نظيره
وليا لفيت الدار فاجهر بالاحساس === وبلغ سلامي كل ذيك العشيره
وختص ابوي اللي نفل جملة الناس === وخصّه بعلمٍ وقل تراني بشيره
لا يا نقى العرض يا بوي لا باس === ان كان تشكي الضيم فأنا اسيره
وان سايلك عني تراني بنوماس === وأنا أحمد اللي ما توسلت غيره
الحمد لو يشرى شريناه بأكياس === بأموالنا نرخص ندوّر الستيره
مطرق فنرجيٍ مضاريبه الراس === ومصلبخٍ جبته عساني ذخيره
من صنع نصرانيٍ مشروبه الكاس === يذكر ورى جاوه بعيدٍ مسيره
أبغيه للي حادينك على الساس === اهل النمايم والحكايا الكثيـره
ربعٍ نووا فيك الردى والتخساس === مهبول ياللي قال غايبٍ عشيره
علي دينٍ لأودع الجمع ينحاس === لين العشير يقوم يلعن عشيره
يا بوي انا ما رحت لكيفت الراس === مع ذا ولاني فى سفاهٍ أوغيره
أما سكنا الدار مـن غير هوجاس === وألا نعاف الدار وندوّر غـيره
كله لعينا كلمةٍ قلت يا دباس === تشكي وأنا دونـي بحـورٍ غريـزه
خذ لك يمين الشرع قطـاّع الأنفـاس === انه فلا جتني علومٍ بصيره
لانيب جاني ولا حبرٍ بقرطاس === ايضا ولا جتني علومٍ سفيره
ان كان تشكي الضيق يا بوي لاباس === جاك الفرج يا بوي هو والبريره
ولا فأنا يا بوي قطاع الأرماس === اصبر على الشدة ولو هي عسيره
يا مسندي يا بوي شف اوكد الناس === ثم أنشده قل ويش هو في مسيره
ان كان ما يفرح صديقك بنوماس === تحرم علينا اللي نهوده صغيره
مدلول مجمول زها زين الالباس === بنت الذي يثني ليا جت كسيره
طارٍ يقول اظهر وطار بجلاس === قمت اشرب التنباك واثره نكيره
ابغى عسى الله يبرد القلب يا ناس === من لاهـبٍ شبت بقلبي سعيره
ومن كان له غايبٍ فلا يقطع الياس === ان قدّر الله جاب علمه بشيره

المساهمات : 109 تاريخ التسجيل : 02/09/2008

ان كان ما يفرح صديقك بنوماس === تحرم علينا اللي نهوده صغيره
مدلول مجمول زها زين الالباس === بنت الذي يثني ليا جت كسيره
طارٍ يقول اظهر وطار بجلاس === قمت اشرب التنباك واثره نكيره
ابغى عسى الله يبرد القلب يا ناس === من لاهـبٍ شبت بقلبي سعيره
ومن كان له غايبٍ فلا يقطع الياس === ان قدّر الله جاب علمه بشيره

روعه بنت مطـــــــــــــــــير
اتحفينا

ننتظر جديدك

لاتستغربين من قلة الردود
بعض الاعضاء في عمره
البعض الاخر
يتعبد الله بشهر الصوم

المساهمات : 192 تاريخ التسجيل : 05/09/2008 العمر : 38

طرح مميز ....تحياتي